Алматының тарихи орталығындағы кешкі жүгіру жарысына 1300 адам қатысты

18 шілде күні Алматыда «Бірінші болу – батылдық» корпоративтік қоры ұйымдастырған Summer Relay жазғы эстафеталық жүгіру жарысы өтті. Биыл жарыс бағыты алғаш рет қаланың тарихи орталығында ұйымдастырылды. Ал кешкі формат Алматының ешқашан ұйықтамайтын қала екенін тағы бір мәрте көрсетті. Жарысқа 300 бала және бес адамнан құралған 200 команда шықты. Жалпы қатысушылар саны 1300 адамды құрады.

Негізгі қашықтық 10 шақырымдық командалық эстафета болды. 15 жастан асқан бес қатысушының әрқайсысы 2 шақырымдық кезеңді жүгіріп өтті. Командалар ерлер, әйелдер, аралас, корпоративтік және кәсіби санаттарда жарысты.

Балалар үшін жеке жүгіру жарыстары ұйымдастырылды:

– 500 м – 4–5 және 6–8 жастағы қатысушылар үшін;
        – 1000 м – 9–11 жастағы балалар үшін;
        – 2000 м – 12–14 жастағы жасөспірімдер үшін.

Summer Relay бағыты Төле би, Қабанбай батыр, Панфилов көшелері және Абылай хан даңғылы арқылы өтті. Қатысушылар Қазақстан Жазушылар одағының ғимараты, Құрманғазы атындағы Қазақ ұлттық консерваториясы, «Алматы» қонақүйі, ақын Жамбыл Жабаевтың ескерткіші, Абай атындағы Қазақ ұлттық опера және балет театры, сондай-ақ мемлекет және қоғам қайраткері, ағартушы Темірбек Жүргеновтің ескерткіші жанынан жүгіріп өтті.

Қала орталығында жүгіру жарыстарын өткізу қатысушыларға таныс көшелер мен көрікті орындарды жаңа қырынан көруге мүмкіндік береді. Күнделікті уақытта қаланың қарбалас қозғалысымен байланысты кеңістік бірнеше сағатқа спорт, қарым-қатынас және отбасылық демалыс алаңына айналды.

Ересектер командалық эстафетада жарысып, балалар өз қашықтықтарына шыққан кезде, жанкүйерлер мен қонақтар үшін ойын-сауық алаңдары жұмыс істеді. Соның арқасында іс-шара қатысушыларды ғана емес, жақындарын қолдауға және кешті спорттық мереке атмосферасында өткізуге келген отбасыларды да біріктірді.

Summer Relay жарысында ұйымдастырушылар экологиялық шешімдерді енгізуді жалғастырды. Қатысушыларға қайта өңдеуге жарамды ПЭТ-1 пластигінен жасалған стақандар берілді. Жарыстан кейін олар бөлек жиналып, әрі қарай қайта өңдеу үшін қордың серіктесі ECO Network компаниясына тапсырылды. Қайталама шикізатты бөлек жинауды қоса алғанда, экологиялық тәжірибелер қордың жарыстарында 2019 жылдан бері жүйелі түрде қолданылып келеді.

Бес командалық санаттың чемпиондарына естелік мүсіншелер мен серіктестердің бағалы сыйлықтары табысталды. PRO және Business санаттарының жеңімпаздары қосымша кубоктар мен ақшалай жүлделер алды.

«Әлемнің көптеген қалаларында ең жарқын жүгіру іс-шаралары дәл орталық көшелерде өтеді. Біз Алматының тарихи орталығы да спортпен айналысуға арналған кеңістік бола алатынын көрсеткіміз келді. Summer Relay қаланың бұл бөлігінде алғаш рет ұйымдастырылды. Мұндай іс-шаралар тұрғындарға таныс көшелерді жаңа қырынан көруге мүмкіндік береді және Алматыны қала тұрғындары мен туристер үшін жаңаша танытады», – деді «Бірінші болу – батылдық» корпоративтік қорының атқарушы директоры Салтанат Қазыбаева.

Бұқаралық жүгіру жарыстары қала экономикасы мен туризмінің маңызды бөлігіне айналып келеді. Jones & Associates Economics зерттеуіне сәйкес, 2025 жылы Chicago Marathon жарысының экономикалық әсері рекордтық 756 миллион долларға жетті. Бұл алдыңғы жылмен салыстырғанда 7,5%-ға көп. Іс-шара 55 мыңнан астам қатысушы мен қонақты тартып, 5 мыңнан астам жұмыс орнын қамтамасыз етті.

«Бірінші болу – батылдық» корпоративтік қорының 2019–2023 жылдар аралығында жүргізген зерттеуі де Almaty Marathon қатысушыларының қонақүйлерді, мейрамханаларды, көлікті және басқа да қалалық қызметтерді белсенді пайдаланатынын көрсетті. Екі күннің ішінде 1000-ға жетпейтін қатысушы шамамен 7,9 миллион теңгеге сауда жасаған. Шығындардың 39%-ы басқа қалалар мен елдерден келген қонақтарға тиесілі болды.

Almaty Marathon Mastercard компаниясы мен Almaty Tourism Bureau бірлесіп дайындаған қаланың туристік әлеуеті туралы зерттеуге де енді. Зерттеуде ірі спорттық және мәдени іс-шаралар Алматыға келетін туристер ағыны мен қала қонақтарының шығындарын арттыратын факторлардың бірі ретінде қарастырылады.

2025 жылы Almaty Marathon жарысына 60 елден 16 мыңнан астам адам, оның ішінде рекордтық 1363 шетелдік жүгіруші қатысты. «Бірінші болу – батылдық» корпоративтік қорының жарыстары Қазақстаннан AIMS халықаралық күнтізбесіне енгізілген жалғыз іс-шаралар болып табылады. Бұл күнтізбе 115 елдегі 445-тен астам марафон мен жүгіру жарысын біріктіреді.

Summer Relay 27 қыркүйекте өтетін 15-ші мерейтойлық Almaty Marathon жарысына дайындық кезеңдерінің бірі болды. Биыл қатысушылар толығымен жаңартылған бағытқа шығады. 2018 жылдан бері алғаш рет жарыс бағыты Алматының орталығы мен тарихи бөлігін қамтып, бір айналымнан тұрады және биіктік айырмасы жағынан ыңғайлы болмақ.

Almaty Marathon жарысына тіркелу almaty-marathon.kz сайтында ашық.

Summer Relay Алматы қаласы әкімдігінің қолдауымен өтті.